தஇஆச-வின் மாத இதழ் "இடைநிலை ஆசிரியர் குரல்" படித்துவிட்டீர்களா? ஆண்டு சந்தா ரூ. 100/- மட்டுமே. பணவிடை அனுப்ப வேண்டிய முகவரி: ம. எட்வின் பிரகாஷ், ஆசிரியர் - “இடை நிலை ஆசிரியர் குரல்” கவின் இல்லம், எண்ணெய் கூட்டுறவு சங்கம் அருகில், ஆசாரிபள்ளம் அஞ்சல், கன்னியாகுமரி மாவட்டம். அ. கு. எண் - 629 201.

5.2.14

வேலூரில் நடைபெற்ற மாநில செயற்குழு முடிவுகள்

தமிழ்நாடு இடைநிலை ஆசிரியர் சங்கத்தின் மாநில செயற்குழு கூட்டம் 02.02.2014, ஞாயிறு காலை 11.00 மணிக்கு வேலூர், ஆசிரியர் இல்லத்தில் மாநிலத் தலைவர் சு. கயத்தாறு தலைமையில் நடைபெற்றது.

வேலூர் மாவட்டச் செயலாளர் பெ. இளங்கோ அனைவரையும் வரவேற்றார். மாநில துணைத் தலைவர்கள் நவநீத சுந்தர், க.மு. பாக்கியராஜ் மற்றும் மாநிலச் செயலாளர் அ. ஜெயராணி ஆகியோர் முன்னிலை வகித்தனர். பொதுச் செயலாளர் க. இசக்கியப்பன் வேலை அறிக்கையை சமர்பித்து உரையாற்றினார். மாநிலப் பொருளாளர் ஆ. மதலைமுத்து புதுக்கோட்டை செயற்குழுவிற்கு பிறகு உள்ள வரவு-செலவு அறிக்கையை வாசித்தார். இடைநிலை ஆசிரியர் குரல் இதழ் ஆசிரியரும் மாநில துணைப் பொதுச் செயலாளருமான ம. எட்வின் பிரகாஷ் இதழ் வரவு-செலவு பற்றி கூறினார்.

பொருள் மீது விவாதத்தில், கன்னியாகுமரி ஹெர்பர்ட் ராஜா சிங், திருநெல்வேலி சரவணன், மாநில இணைச் செயலாளர் விருதுநகர் அப்பாத்துரை, நீலகிரி சிவராமன், சென்னை கமலகண்ணன், வேலூர் பால்ராஜ், திருவண்ணாமலை வெங்கட்ராமன், திருச்சி தியாகராஜன் ஆகியோர் பங்கேற்று பேசினர். வேலூர் மாவட்ட பொருளாளர் குணசேகரன் நன்றி கூறினார்.

தீர்மானங்கள்:

1. பிப்ரவரி 28ஆம் தேதிக்குள் தமிழ்நாட்டில் அரசு / நகராட்சி / மாநகராட்சி/அரசு உதவி பெறும் உயர்நிலை மேல்நிலைப்பள்ளிகளில் 6,7,8 வகுப்புகளில் பணியாற்றும் 25,000 இடைநிலை ஆசிரியர்களை பட்டதாரி ஆசிரியர்களாக உட்படுத்திட நடவடிக்கை எடுத்திட வலியுறுத்தி தீர்மானம் நிறைவேற்றப்பட்டது.

2. மத்திய அரசுப்பள்ளி இடைநிலை ஆசிரியர்களுக்கு இணையாக தமிழக இடைநிலை ஆசிரியர்களுக்கும் ஊதிய விகிதத்தை Pay Band 1இல் இருந்து (5200 + 2800 - 20200) Pay Band 2க்கு மாற்றி (9300 + 4200 - 34800) அமைத்திட மாண்புமிகு தமிழக முதல்வரை வலியுறுத்தி தீhமானம் நிறைவேற்றப்பட்டது.

3. 2013-14ம் கல்வியாண்டில் பதவி உயர்வு பட்டியலில் உள்ள இடைநிலை ஆசிரியர் அனைவருக்கும் அவர்களது பணியிடத்தினை அரசாணை எண் 100, பள்ளிக்கல்வித்துறை, நாள் 27.06.2003ன் அடிப்படையில் பட்டதாரி ஆசிரியர் பணியிடமாக தரம் உயர்த்தி அப்பள்ளியிலேயே பதவி உயர்வு வழங்கிட நடவடிக்கை எடுத்திட மதிப்புமிகு பள்ளிக்கல்வி செயலாளரை வலியுறுத்தி தீர்மானம் நிறைவேற்றப்பட்டது.

4. தமிழக முதல்வரின் தேர்தல் வாக்குறுதியை அமல்படுத்தும் விதமாக தன் பங்கேற்பு ஓய்வூதியத்தை ரத்து செய்து பழைய ஓய்வூதிய திட்டத்தினை அமல்படுத்திட வலியுறுத்தி தீர்மானம் நிறைவேற்றப்பட்டது.

5. அரசாணை எண் 216ஐ அனைவருக்கும் பொருந்துமாறு உயர், மேல்நிலைப்பள்ளி இடைநிலை ஆசிரியர் அனைவரும் பயன்பெறும் வகையில் பொது ஆணையாக வெளியிட மதிப்புமிகு பள்ளிக்கல்வி செயலாளரை வலியுறுத்தி தீர்மானம் நிறைவேற்றப்பட்டது.

6. M.Com., B.Ed., M.A.(Eco), B.Ed., முடித்த இடைநிலை ஆசிரியர்களுக்கு நேரடி பதவி உயர்வாக முதுகலை ஆசிரியர் பதவி உயர்வு வழங்கிட நடவடிக்கை எடுத்திட பள்ளிக்கல்வித்துறையை வலியுறுத்தி தீர்மானம் நிறைவேற்றப்பட்டது.

7. சிறுபான்மை இடைநிலை ஆசிரியர்களுக்கு பட்டதாரி ஆசிரியர் பதவி உயர்வு வழங்கிட வலியுறுத்தி தீர்மானம் நிறைவேற்றப்பட்டது.

8. தேர்வு பணிகளில் இடைநிலை ஆசிரியர்களை பயன்படுத்திடுவதை தவிர்த்திடுமாறு மதிப்புமிகு தேர்வு துறை இயக்குனரை வலியுறுத்தி தீர்மானம் நிறைவேற்றப்பட்டது.

9. உபரி ஆசிரியர் பணியிட மாறுதலில் முடிவுறு பணித் தொகுதியாகி வரும் உயர், மேல்நிலைப் பள்ளி இடைநிலை ஆசிரியர்களுக்கு விலக்கு தந்திட பள்ளிக்கல்வி செயலரை வலியுறுத்தி தீர்மானம் நிறைவேற்றப்பட்டது.

10. வரும் காலங்களில் ஆசிரியர் நியமனங்களை ஆகஸ்ட் 31ம் தேதிக்குள் முடித்து, மாணவர் நலன் காத்திட அரசு நடவடிக்கை எடுத்திட வலியுறுத்தி தீர்மானம் நிறைவேற்றப்பட்டது.

11. மேற்கண்ட கோரிக்கைகளை வலியுறுத்தி பிப்ரவரி 25ம் தேதி மாநிலம் தழுவிய மாலை நேர ஆர்ப்பாட்டம் நடத்திட முடிவு செய்யப்பட்டது.

12. கோரிக்கையை அரசு நிறைவேற்ற தவறும் பட்சத்தில் உட்படுத்துதல், முதுகலை ஆசிரியர் பதவி உயர்வு, அரசாணை 216ஐ அமல்படுத்திட வலியுறுத்தி சென்னை உயர்நீதிமன்றத்தில் மாநில அமைப்பின் சார்பில் மார்ச் தொடக்கத்தில் வழக்கு தொடர முடிவு செய்யப்பட்டது.
.

ஆசிரியர் தகுதி தேர்வில்(TET) இட ஒதுக்கீட்டுப் பிரிவினருக்கு 5 சதவீத மதிப்பெண் சலுகை

ஆசிரியர் தகுதி தேர்வில் (TET) இட ஒதுக்கீட்டுப் பிரிவினருக்கு 5 சதவீத மதிப்பெண் சலுகை வழங்கப்படும் என்று சட்டப்பேரவையில் முதல்வர் ஜெயலலிதா அறிவித்தார்.

அதன்படி, தாழ்த்தப்பட்டோர், பழங்குடியினர், பிற்படுத்தப்பட்டோர், முஸ்லிம் சமுதாயத்தில் பிற்படுத்தப்பட்டோர், மிகவும் பிற்படுத்தப்பட்டோர், சீர்மரபினர் மற்றும் மாற்றுத் திறனாளிகள் ஆகியோருக்கு இனி 5 சதவீத மதிப்பெண் சலுகை வழங்கப்படும்.

இது குறித்து சட்டப்பேரவையில் இன்று ஆளுநரின் உரைக்கு நன்றி தெரிவிக்கும் தீர்மானத்தின் மீதான விவாதத்துக்கு பதில் அளித்து முதல்வர் ஜெயலலிதா பேசியது:

ஆசிரியர் தகுதித் தேர்வு, அதாவது (Teachers Elegibility Test) தேர்வில் தாழ்த்தப்பட்டோர், பழங்குடியினர், பிற்படுத்தப்பட்டோர், மிகவும் பிறப்படுத்தப்பட்டோர் ஆகியோருக்கு மதிப்பெண்ணில் சலுகை வழங்கப்பட வேண்டும் என்ற வேண்டுகோளினை சில உறுப்பினர்கள் இங்கே தெரிவித்தனர்.

2009-ம் ஆண்டைய குழந்தைகளுக்கான இலவச மற்றும் கட்டாயக் கல்வி உரிமைச் சட்டம் மத்திய அரசால் இயற்றப்பட்டுள்ளது. இந்தச் சட்டத்தின்படி, பள்ளிகளில் ஆசிரியர்களாக நியமனம் செய்யப்படுபவர்கள் அரசால் நியமிக்கப்பட்ட நிறுவனத்தால் நடத்தப்படும் ஆசிரியர் தகுதித் தேர்வில் தேர்ச்சி பெற்றிருக்க வேண்டும்.

இந்தச் சட்டத்தின் அடிப்படையில், தேசிய ஆசிரியர் கல்விக் குழுமம், 1 முதல் 8-ம் ம் வகுப்பு வரையிலான ஆசிரியர்களுக்கு தகுதித் தேர்வினை கட்டாயமாக்கி அறிவிக்கை வெளியிட்டுள்ளது.

தேசிய ஆசிரியர் கல்விக் குழுமத்தின் அறிவிக்கைகளின்படி, 1 முதல் 5-ம் வகுப்புக்கான இடைநிலை ஆசிரியர்கள், தேசிய ஆசிரியர் கல்விக் குழுமம் ஒழுங்குமுறை விதிகள் 2002-ன் படி ஆசிரியர் பயிற்சியில் இரண்டாண்டு பட்டயப்படிப்பும்; மேல்நிலைத் தேர்வில் குறைந்தபட்சம் 45 சதவீத மதிப்பெண்களும் பெற்றிருக்க வேண்டும். 2002-ம் ஆண்டு ஒழுங்கு விதிமுறைகளுக்கு முன் இரண்டாண்டு பட்டயப் படிப்பு தேர்ச்சி பெற்றிருந்தால், மேல்நிலைத் தேர்வில் குறைந்தபட்சம் 50 சதவீத மதிப்பெண்கள் பெற்றிருக்க வேண்டும்.

அதேபோன்று, 6 முதல் 8 ஆம் வகுப்புக்கான பட்டதாரி ஆசிரியர்கள், தேசிய ஆசிரியர் கல்விக் குழுமம் ஒழுங்குமுறை விதிகள் 2002-ன் படி, ஒர் ஆண்டு பி.எட். பட்டமும், பட்டப் படிப்பில் 45 சதவீத மதிப்பெண்களும் பெற்றிருக்க வேண்டும்.

2002 ஆம் ஆண்டுக்கு முன் பி.எட். பட்டம் பெற்றிருந்தால், பட்டப் படிப்பில் 50 சதவீத மதிப்பெண் பெற்றிருக்க வேண்டும்.

இதன் பின்னர், தேசிய ஆசிரியர் கல்விக் குழுமத்தால் 1.4.2011 அன்று வெளியிடப்பட்ட கடிதத்தில், அந்தந்த மாநிலங்களில் கடைபிடிக்கப்படும் இட ஒதுக்கீட்டு கொள்கைக்கு ஏற்ப, தாழ்த்தப்பட்ட மற்றும் பழங்குடியின பிரிவினருக்கு மட்டும் மேல்நிலைத் தேர்வு மற்றும் பட்டப் படிப்பு தேர்வில் குறைந்தபட்ச மதிப்பெண்களில் 5 சதவீதம் தளர்வு அளிக்கலாம் என தெரிவித்துள்ளது.

இதன்படி, 2002-ம் ஆண்டுக்கு பின் ஆசிரியர் பயிற்சி பட்டயப் படிப்பை முடித்தவர்கள் மேல்நிலை தேர்வில் 40 சதவீத மதிப்பெண்ணும்; அதற்கு முன்னர் தேர்வு பெற்றவர்கள் 45 சதவீத மதிப்பெண்ணும் பெற்றிருக்க வேண்டும்.

ஆனால், தற்போது தமிழகத்தில் மேல்நிலைத் தேர்வில் தேர்ச்சி பெற்றுள்ளவர்கள், அதாவது 35 சதவீதம் பெற்றவர்களும், ஆசிரியர் தகுதித் தேர்வு எழுத அனுமதிக்கப்படுகின்றனர். எனவே, மத்திய அரசு அறிவித்துள்ளதை விட அதிகச் சலுகை தமிழ் நாட்டில் அளிக்கப்பட்டுள்ளது.

அதே போன்று, 2002-ம் ஆண்டுக்கு பின் பி.எட். படித்தவர்கள், பட்டப் படிப்பில் 45 சதவீத மதிப்பெண்களும், அதற்கு முன்னால் பி.எட். படித்தவர்கள், பட்டப் படிப்பில் 50 சதவீத மதிப்பெண்களும் பெற்றிருக்க வேண்டும். தமிழகப் பல்கலைக்கழகங்கள் 40 சதவீத மதிப்பெண் பெற்றிருந்தாலே பட்டம் வழங்குவதால், மத்திய அரசு அறிவித்துள்ளதை விட தமிழகத்தில் அதிகச் சலுகை அளிக்கப்பட்டுள்ளது.

ஆசிரியர் தகுதித் தேர்வில் தேர்ச்சி பெற 60 சதவீதம் பெற வேண்டும் என தேசிய ஆசிரியர் கல்விக் குழுமத்தால் நிர்ணயிக்கப்பட்டுள்ளது.

அதே சமயத்தில், தாழ்த்தப்பட்டோர், பழங்குடியினர், இதர பிற்படுத்தப்பட்டோர் மற்றும் மாற்றுத் திறனாளிகள் ஆகியோருக்கு அந்தந்த மாநிலத்தில் உள்ள இட ஒதுக்கீடு கொள்கையின்படி தேர்ச்சி மதிப்பெண்களில் சலுகை வழங்கிடப் பரிசீலிக்கலாம் எனவும் குறிப்பிடப்பட்டுள்ளது.

ஆசிரியர் தகுதி தேர்வின் தேர்ச்சி, இட ஒதுக்கீட்டை நிர்ணயிப்பதில்லை. ஆசிரியர்களை பணியிடங்களில் நியமிக்கும்போது தான் இட ஒதுக்கீடு கடைபிடிக்கப்படுகிறது. ஆசிரியர் நியமனத்தில் 69 சதவீத இட ஒதுக்கீடு முழுமையாக பின்பற்றப்படுகிறது.

எனினும், இந்த அவையில் தெரிவிக்கப்பட்ட கருத்துக்களின் அடிப்படையில், ஆசிரியர் தகுதி தேர்வில் தேர்ச்சி பெற 60 சதவீதம் மதிப்பெண் பெற வேண்டும் என நிர்ணயிக்கப்பட்டிருந்தாலும், இனி தாழ்த்தப்பட்டோர், பழங்குடியினர், பிற்படுத்தப்பட்டோர், பிற்படுத்தப்பட்டோர் (முஸ்லீம்), மிகவும் பிற்படுத்தப்பட்டோர், சீர்மரபினர் மற்றும் மாற்றுத் திறனாளிகள் ஆகியோருக்கு 5 சதவீத மதிப்பெண் சலுகை வழங்கப்படும்.

அதாவது தாழ்த்தப்பட்டோர், பழங்குடியினர், பிற்படுத்தப்பட்டோர், பிற்படுத்தப்பட்டோர் (முஸ்லீம்), மிகவும் பிற்படுத்தப்பட்டோர், சீர்மரபினர் மற்றும் மாற்றுத் திறனாளிகள் ஆகியோர் ஆசிரியர் தகுதித் தேர்வில் இனி 55 சதவீதம் மதிப்பெண் பெற்றாலே தேர்ச்சி பெற்றவர்கள் என அறிவிக்கப்படுவார்கள். இந்தச் சலுகை தற்போது ஆகஸ்ட் 2013ஆம் ஆண்டு ஆசிரியர் தேர்வு வாரியத்தால் நடத்தப்பட்டுள்ள தகுதி தேர்வுக்கும் பொருந்தும்.

இவ்வாறு முதல்வர் ஜெயலலிதா தெரிவித்தார்.
.

தமிழ்நாடு இடைநிலை ஆசிரியர் சங்க மாநில செயற்குழு கூட்டம்

வேலூர் ஆசிரியர் இல்லத்தில் வைத்து தமிழ்நாடு இடைநிலை ஆசிரியர் சங்கத்தின் மாநில செயற்குழு கூட்டம் 02-02-2014 ஞாயிறு அன்று நடைபெற்றது.

தமிழ்நாடு இடைநிலை ஆசிரியர் சங்க மாநில தலைவர் கயத்தாறு தலைமை தாங்கினார். மாநிலத் துணைத் தலைவர்கள் பக்கியராஜ், நவநீதசுந்தர் ஆகியோர் முன்னிலை வகித்தனர். வேலூர் மாவட்ட செயலாளர் இளங்கோ வரவேற்றார். பொது செயலாளர் இசக்கியப்பன், பொருளாளர் மதலைமுத்து, துணைப் பொதுச் செயலாளர் எட்வின் பிரகாஷ், மாநில செயலாளர் ஜெயராணி, மாநில இணைச் செயலாளர் அப்பாத்துரை  உட்பட அனைத்து மாவட்ட செயலாளர்களும் பங்கேற்றனர்.

இதில் தமிழ்நாட்டில் உள்ள அரசு, மாநகராட்சி, நகராட்சி மற்றும் அரசு நிதிஉதவி பெறும் மேல்நிலைப்பள்ளியில் பணியாற்றும் 25 ஆயிரத்து 500 இடைநிலை ஆசிரியர்களை 01-06-2006க்கு முன் இருந்து பட்டதாரி ஆசிரியர்களாக பதவி உயர்த்திட வேண்டும். தற்போது பின்பற்றப்படும் ஓய்வூதிய திட்டத்தினை ரத்து செய்து பழைய ஓய்வூதிய திட்டத்தினை அமல்படுத்திட வேண்டும் என்பது உள்ளிட்ட தீர்மானங்கள் நிறைவேற்றப்பட்டன.

சங்க பொறுப்பாளர்கள், ஆசிரியர்கள் பலர் கலந்து கொண்டனர்.
.

5.1.14

அரசு ஊழியர்கள் மற்றம் ஆசிரியர்களுக்கு பொங்கல் பரிசு அறிவிப்பு

அரசு ஊழியர்கள் மற்றம் ஆசிரியர்களுக்கு பொங்கல் போனஸ் வழங்க தமிழக முதல்வர் ஜெயலலிதா உத்தரவிட்டுள்ளார்.

சி மற்றும் டி பிரிவு ஊழியர்களுக்கு அதிகபட்சமாக ரூ.3000க்கு உட்பட்டு ஒரு மாத சம்பளம் போனசாக வழங்கப்படும் எனவும், ஏ மற்றும் பி பிரிவு ஊழியர்களுக்கு ரூ.1000 போனஸ் வழங்கப்படும் எனவும் ஜெயலலிதா தெரிவித்துள்ளார்.

மேலும் ஓய்வூதியதாரர்கள், குடும்ப ஓய்வூதியதாரர்கள் மற்றும் முன்னாள் விஏஓ.,க்களுக்கு ரூ.500 வழங்கவும் ஜெயலலிதா உத்தரவிட்டுள்ளார்.
.

13.12.13

மலைப்பகுதிகளில் பணியாற்றும் அரசு ஊழியர்களுக்கான படி அதிகரிப்பு

மலைப்பகுதிகளில் பணியாற்றும் அரசு ஊழியர்களுக்கான படி மாதம் ஆயிரத்து 500 ரூபாயாக அதிகரிக்கப்படும் என்று முதல்வர் ஜெயலலிதா தெரிவித்தார்.

சென்னைத் தலைமைச் செயலகத்தில் நடைபெற்ற மாவட்ட ஆட்சியர்கள் மற்றும் காவல்துறை அதிகாரிகள் மாநாட்டில், நிறைவுரை ஆற்றிய முதல்வர் ஜெயலலிதா 312 அறிவிப்புகளை வெளியிட்டார். அவற்றில் சில:

* மலைப்பகுதிகளில் பணியாற்றும் அரசு ஊழியர்களுக்கான படித்தொகை மாதம் ஆயிரத்து 500 ரூபாயாக அதிகரிப்பு.

* அரசு ஊழியர்களுக்கான குளிர்காலபடி மாதம் 500 ரூபாயாக உயர்த்தப்படும்.

* சிவகங்கை அரசு மருத்துவ கல்லூரி மருத்துவமனையில் அம்மா உணவகம் ஏற்படுத்தப்படும்.

* தேனி மாவட்டம் கண்டமனூர்விளக்கு என்ற இடத்தில் 110/22 கிலோ வோல்ட் துணை மின்நிலையம் அனுமதிக்கப்படும்.

* வைகை ஆற்றில் வாலிப்பாறை மற்றும் கோவிந்த நகரம் ஆகிய இடங்களில் தடுப்பணைகள் கட்டப்படும்.

* சிவகங்கை மாவட்டம் காரைக்குடி தாலுகா அமராவதி புதூர் மற்றும் பூசலகுடி ஆகிய இடங்களில் 110/22 கிலோ வோல்ட் துணை மின்நிலையம் அமைக்கப்படும்.

* சிவகங்கை மாவட்டம் குறுந்தம்பட்டு ஊராட்சியில் மணிமுத்தாறு ஆற்றின் மீது உயர்மட்ட பாலம் கட்டப்படும்.

* தூத்துக்குடியிலிருந்து வாஞ்சி மணியாச்சி சந்திப்பு வரை சாலை அமைக்கப்படும்.

* மதுரை - தூத்துக்குடி சாலை 130/4 முதல் 133/2 வரை அகலப்படுத்தப்படும்.

* தூத்துக்குடி மாவட்டத்தில் கடலோரப் பகுதிகளில் குழந்தை பிறப்பை குறைக்க புதிய திட்டம் அனுமதிக்கப்படும்.

* முக்காணி அருகே தாமிரபரணி ஆற்றில் தடுப்பணை கட்டப்படும்.

* திருவள்ளூர் மாவட்டம் பூந்தமல்லி நகராட்சியில் பாதாள சாக்கடை திட்டம் அனுமதிக்கப்படும்.

* கோவை மாநகரில் மோனோ ரயில் இயக்க பூர்வாங்க ஆய்வு மேற்கொள்ளப்படும்.

* கோவை காந்திபுரத்தில் ஒருங்கிணைந்த பேருந்து முனையம் அமைக்க ஆய்வு மேற்கொள்ளப்படும்.

* திருச்சி திருவெறும்பூரில் புதிய மருத்துவமனை அமைக்கப்படும்.

* சேலம் தலைவாசல், பனைமரத்துப்பட்டியில் விதை கிடங்குகள் அமைக்கப்படும்.

* திருவள்ளூரில் புதிய நவீன ஒருங்கிணைந்த பேருந்து நிலையம் அமைக்கப்படும்.

* கொசஸ்தலையாற்றில் தடுப்பணை அமைக்கப்படும்.

* புதிதாக அமைக்கப்பட்ட திருவொற்றியூர் மற்றும் மதுரவாயல் தாலுகாக்களுக்கு, தாலுகா அலுவலக கட்டடங்கள் கட்டப்படும்.

* திருந்தங்கல் ஆரம்ப சுகாதார நிலையம், தாலுகா தலைமை மருத்துவமனையாக தரம் உயர்த்தப்படும்.

* சிவகாசி - தென்காசி மற்றும் சிவகாசி - ஸ்ரீவில்லிபுத்தூர் மாநில நெடுஞ்சாலையில் ஆணையூர் ஊராட்சி எல்லைக்குட்பட்ட புதிய ரயில்வே மேம்பாலம் கட்டப்படும்.

* திருவாரூர் மாவட்டத்தில் 8 குளங்கள் புதுப்பிக்கப்படும்.

* திருவாரூர் நகரில் கமலாலயம் குளம் தூர்வாரப்படும்.

* திருவாரூர் மாவட்டம் நீடாமங்கலம் தாலுகாவில் உள்ள மூணாறு தலைப்பு என்ற இடம் சுற்றுலா தலமாக மாற்றப்படும்.

* வைகை அணையிலிருந்து வத்தலகுண்டு பேரூராட்சிக்கு குடிநீர் வழங்கப்படும்.
.

11.11.13

மொஹரம் விடுமுறையில் மாற்றம்

மொஹரம் பண்டிகையை முன்னிட்டு வரும் 15ம் தேதி விடுமுறை அளிக்கப்படுவதாக தமிழக அரசு அறிவித்துள்ளது.

முன்னதாக நவம்பர் 14ம் தேதி மொஹரம் பண்டிகையை முன்னிட்டு விடுமுறை என அறிவிக்கப்பட்டிருந்தது.

பிறை தென்படாததால் நவம்பர் 15ம் மொஹரம் என தலைமை ஹாஜி அறிவித்துள்ளார்.
 .

30.10.13

புதிய பள்ளிக் கல்வித் துறை அமைச்சர் - கே.சி.வீரமணி

தமிழக அமைச்சரவையில் மாற்றம் செய்யப்பட்டுள்ளது. சுகாதாரத்துறை அமைச்சராக இருந்த கே.சி.வீரமணி பள்ளிக் கல்வித் துறை அமைச்சராக இலாகா மாற்றம் செய்யப்பட்டுள்ளார்.

விராலி மலை சட்டமன்ற உறுப்பினர் டாக்டர் சி.விஜயகுமார் தமிழக சுகாதாரத்துறை அமைச்சராக நியமனம் செய்யப்பட்டுள்ளார். புதிய அமைச்சராக அவர், நவம்பர் 1- ஆம் தேதி பதவியேற்பார் என தெரிவிக்கப்பட்டுள்ளது.
 .

10.10.13

தஇஆச மாநில செயற்குழுக் கூட்டம் - அழைப்பிதழ்


நாள் 
20.10.2013, ஞாயிறு, காலை 10.00 மணி

இடம்
புதுக்கோட்டை.

தலைமை
திரு. சு. கயத்தாறு
மாநிலத் தலைவர்

முன்னிலை
திரு. ஆ. சங்கர்
மாநில துணைத் தலைவர் 

திரு. செ. பாபு
மாநில தணிக்கையாளர் 

வரவேற்புரை
திரு. சி. செந்தில் குமார்
மாவட்டச் செயலாளர், புதுக்கோட்டை.

வேலை அறிக்கை
திரு. க. இசக்கியப்பன்
பொதுச் செயலாளர்.

வரவு – செலவு அறிக்கை
திரு. ஆ. மதலைமுத்து
மாநிலப் பொருளாளர்

இதழ் அறிக்கை
திரு. ம. எட்வின் பிரகாஷ்
மாநில துணைப் பொதுச் செயலாளர்

சங்க கூட்ட திட்ட வெளியீடு
திரு. அ. அருணகிரியார்
மாநில அமைப்புச் செயலாளர்

நன்றியுரை
திரு. ச. வெங்கடேசன்
மாநில தலைமையிடச் செயலாளர் 

பொருள்:

1. 2013-14 உறுப்பினர் சேர்க்கை.

2. நமது முழக்கம் - இதழ் சந்தா.

3. அதிகாரிகளுடன் சந்திப்பு.

4. நீதிமன்ற நடவடிக்கைகள்.

5. P.P. 750 மற்றும் சிறப்புபடி 500 தொடர்பாக.

6. வழக்கு நிதி.

7. புதிய மாவட்டக்கிளை உருவாக்குதல்.

8. இதழ் புரவலர் திட்டம் மற்றும் விளம்பரம் பெறுதல்.

9. செயற்குழு உறுப்பினர் கொணர்வன.


மாநிலப் பொறுப்பாளர்கள், மாநில துணைப் பொறுப்பாளர்கள், வருவாய் மாவட்ட செயலாளர்கள் ஆகிய அனைவரும் தவறாது கலந்து கொள்வதோடு, தங்கள் மாவட்ட கருத்துக்களையும் சங்க வளர்ச்சி குறித்த கருத்துகளையும் முன்வைக்க அன்புடன் அழைக்கிறேன்.

என்றென்றும் சங்கப் பணியில்,

க. இசக்கியப்பன்,

பொதுச் செயலாளர்.
.

அரசு ஊழியர், ஆசிரியர்களுக்கு 10% அகவிலைப்படி உயர்வு

தமிழ்நாடு அரசு அலுவலர்கள், ஆசிரியர்கள், ஓய்வூதியம் மற்றும் குடும்ப ஓய்வூதியம் பெறுவோர்களுக்கான அகவிலைப்படியை 10 விழுக்காடு உயர்த்தி வழங்க முதல்வர் ஜெயலலிதா உத்தரவிட்டுள்ளார்.

இது தொடர்பாக அவர் இன்று வெளியிட்டுள்ள அறிக்கையில், கூறியுள்ளதாவது:
மக்களின் குரலே மகேசனின் குரல்" என்று பேரறிஞர் அண்ணா வகுத்துக் கொடுத்த வழிமுறையும், எனது தலைமையிலான அரசு கடைபிடித்து வரும் "மக்களுக்குச் செய்யும் பணி, மகேசனுக்கு செய்கின்ற பணி" என்ற குறிக்கோளும் உலகம் முழுவதும் ஏற்றுக்கொள்ளப்பட்ட கோட்பாடாக விளங்குகிறது. இப்படிப்பட்ட இன்றியமையாத் தன்மை வாய்ந்த மக்கள் தொண்டினை செய்யும் வாய்ப்பையும், அதற்கான வழிமுறையையும் பெற்ற அரசு அலுவலர்கள் மற்றும் ஆசிரியர்களின் நலன்களைக் காப்பதிலும், அவர்களுக்கு உரிய சலுகைகளை வழங்குவதிலும் எனது தலைமையிலான அரசு முனைப்புடன் செயல்பட்டு வருகிறது.

அந்த வகையில், மத்திய அரசு அலுவலர்களுக்கான அகவிலைப் படியை 1.7.2013 முதல் மத்திய அரசு 10 விழுக்காடு உயர்த்தி அறிவித்ததையடுத்து, தமிழ்நாடு அரசு அலுவலர்கள், ஆசிரியர்கள், ஓய்வூதியம் மற்றும் குடும்ப ஓய்வூதியம் பெறுவோர்களுக்கான அகவிலைப்படியை 10 விழுக்காடு உயர்த்தி வழங்க உத்தரவிட்டுள்ளேன் என்பதையும், இந்த அகவிலைப்படி உயர்வு 1.7.2013 முதல் கணக்கிடப்பட்டு ரொக்கமாக வழங்கப்படும் என்பதையும் தெரிவித்துக் கொள்கிறேன்.

இந்த அகவிலைப் படி உயர்வு, உள்ளாட்சி நிறுவனங்கள் மற்றும் அரசு மானியம் பெறும் கல்வி நிறுவனங்களில் பணிபுரியும் அலுவலர்கள், ஆசிரியர்கள், வருவாய் துறையில் பணிபுரியும் கிராம உதவியாளர்கள், அங்கன்வாடி மற்றும் சத்துணவு ஊழியர்கள், ஊராட்சி உதவியாளர்கள், எழுத்தர்கள் மற்றும் வழக்கமாக அகவிலைப்படி அளிக்கப்படும் அனைவருக்கும் பொருந்தும்.

இந்த அகவிலைப் படி உயர்வினால் சுமார் 18 லட்சம் அரசு அலுவலர்கள் மற்றும் ஓய்வூதியம் பெறுவோர் பயனடைவர். இந்த அகவிலைப்படி உயர்வு மூலம் அரசுக்கு ஆண்டொன்றுக்கு 2,292 கோடியே 78 லட்சம் ரூபாய் கூடுதல் செலவு ஏற்படும். எனது தலைமையிலான அரசின் இந்த நடவடிக்கை, அரசு ஊழியர்கள் மற்றும் ஆசிரியர்கள் தங்களது கடமைகளை மேலும் சிறப்புடன் பணியாற்ற வழிவகுக்கும்"
என்று கூறியுள்ளார்.

அகவிலைப்படி உயர்வு அரசாணை எண். 401 நாள்: 10-10-2013
.

பிரபலமான இடுகைகள்

தமிழ்நாடு இடைநிலை ஆசிரியர் சங்கம்